Iran nuclear plan thuruk tiputrutu CIA agent thiam loh chantir

Iran-in nuclear program a kalpui mek tihbuaina tura US-in hma lak a tum dan thuruk, New York Times reporter hnena lo ti putrutu, CIA agentu hlui Jeffrey Sterling chu Thawhṭanni khan thiam loh chantir a ni.

Alexandria, Virginia-a US court chuan Sterling hi an puhna pakua-ah thiam loh a chantir.

Sterling-a thubuai hian ngaihven a hlawh hle a, US justice depart­ment-in Times reporter James Risen hnenah a thuruk hriatna puangchhuak tura a nawrh luih chungchangah journalist-te'n an thu hriatna zep tura dikna an neih dante pawh nasa taka sawichhuah a ni. Risen hian court-a thuruk hrilhtu nemnghettua ṭan ai chuan jail-a tan mai a thlan thu a sawi hnuah sorkar chuan a nawr lui zui ta lo a ni.

Iran-in nuclear program a kalpui mek tihhlawhchham a nih theihna atana CIA-in Iran hnena thu dik tawk lo hrilh a tum dante chu Sterling hian Risen hnenah a hrilh a, mahse a hnuah sorkar chuan he thil hian agent-te din­hmun a tiderthawng thei a ni tiin, a titawp leh ta zawk a ni.

Risen-a'n a lehkhabu, State of War tiha a thuruk hriatte a tarlan chu Sterling hi a hrilh thei awm­chhun a ni tiin prosecutor-te chuan an sawi. Sterling hian thiam loh chantir a nihnate hi April thlaa a hremna tihchhuah a nih hunah a appeal thei ang.