Greece PM thar atan Tsipras

Greek far-left Syriza party hruaitu, Alexis Tsipras chu Prime Minister thar atan lakluh a ni a, ṭangrual sorkar a ho dawn a ni. Tsipras hi kum 40-a upa a ni a, kum 150 chhunga Greece Prime Minister naupang ber a ni.

Prime Minister atana lakluh a nih hma hian Tsipras hian Independent Greeks party nena thawhdunna tur a tifel a ni.

European Commission hotu, Jean-Claude Juncker chuan Tsipras chu lawmpuina hlanin, Greece-in leiba a ngah avanga sum lama harsatna a tawh mekte chinfel dan kawng zawnga sorkar hmalaknaah EU chuan puih a inhuam reng a ni, a ti.

PM thar hian inthlan dawn­a a campaign-naah an ram sum dinhmun siamṭhatna tura EU-in dollar tluklehding­awn 240 hmanga khaichhuah (bailout) a tumna chu ngaihtuah ṭhat leh a tiam. Pathiannia inthlan result puan zawha mipui hmaa thu a sawi hmasak berah pawh, Tsipras hian an rama inrenchemna kalpui vanga harsatna leh zahna hrang hrang an tawhte chu tih­tawp a tiam a, hei hi Greece leh Europe ram dangte tana pawha ṭhatna tur zawk a ni, a ti.