Spain-a F-16 chesualah mi 10 an thi

Spain rama NATO training centre awmna, military base aṭanga Greece fighter jet, F-16 thlawkchhuak chu chesualin a tla a, sipai 10 an thi. Thite hi France sipai pariat leh Greece sipai pahnih an ni.

F-16 jet hi Albacete khaw bula military base aṭanga a thlawkchhuak chu a che buai nghal a, thlawhtheihna dang dinna hmunah a tla a, thlawhtheihna panga a chhe tel niin defence ministry chuan a sawi. Mi 10 an thih bakah midang 21 in hliam an tuar a, an zinga panga-te chu an dinhmun a ṭha lo hle.

Spain Prime Minister Mariano Rajoy chuan chetsualna thleng chu pawi a tih thu a sawi a, chetsualna thlen dan chu chhui chian a nih tur thu a sawi.

Jet hi NATO training exercise, Tactical Leadership Program-a tel a ni a, he training hi air operation-a ram hrang hrangte thawhhona siamṭhatna atana buatsaih a ni. He exercise-ah hian Britain, Germany, US leh Spain pawh an tel a, mahse thi leh hliam tuar zingah an mi leh sate an tel ve lo.

NATO Secretary General Jens Stoltenberg chuan vanduaina thleng hian a deng na hle tih a sawi a, "He vanduaina hian NATO chhungkaw pum a nghawng a, thi chhungte ka tuarpuiin, hliam tuarte pawh an ṭhat leh thuai ka duhsak a ni," a ti.

Tactical Leadership Program hi kum 1978 khan NATO Central Region air force-in a siam a ni a, he program-ah hian NATO ram 10 an tel.