Mali sipai sorkarin kum thum hun pek an duh

Mali sorkar paihthla a, thuneihna chelh mektu sipaite chuan civil sorkar hnena thuneihna hlanchhawn nan kum thum hun pek an duh thu an sawi a, hemi rual hian President an paihthlak tak, Ibrahim Boubacar Keita pawh chhuah an remti bawk. 

President leh a kaihhruai sorkar paihthlatu, sipai pawlte be tur hian Economic Community of West African States (ECOWAS) palaite chu Mali khawpui, Bamako-ah kalin, sipai sorkar dintu Colonel Assimi Goita leh hruaitu dangte an hmu a ni. 

ECOWAS palaite hi Nigeria president hlui Goodluck Jonathan-a'n a ho a, Pathianni khan sipai hotute hi hmuin, nimin khan an inbe chhunzawm leh bawk. Mali sipai sorkar hian an rama civil sorkar din tura ngenna chu an remtih thu leh, mahse thuneihna inhlanchhawnna tur hian kum thum chhung tal hun an duh tur thu an sawi a, ECOWAS palaite ngenna angin President hlui Keita an hren mek pawh chhuah an remti thu an sawi. 

Keita hi ram pawn lama inenkawl tura a kal duh a nih pawhin harsatna a awm loh thu an sawi bawk. Keita an man ruala an man tel, prime minister Boubou Cisse pawh hmun him lamah dah an remti bawk. 

ECOWAS palaite chuan Keita hi president atan dahlet leh turin ngen mah se sipai lam hian an remti lo a, Mali ram mipuite pawhin President paihthlatu, sipai lam an thlawpna lantirin kawng te an lo zawh tawh a ni. Mali mipuite hian a hmain Keita hi bang tura phutin lungawi lohna an lo lantir fo tawh a ni.