Philippine-ah bomb a puak, mi 10 an thi

Phillippine chhim lam thliarkarah nimin khan bomb vawi hnih a puak a, mi 10 an thih bakah hliam eng emaw zat an awm.

Bomb puahna hmun hi official-te chuan Islamist firfiak tamna hman a nih thu an sawi a, thi leh hliam zingah hian sipai-te pawh an tel. Bomb puak hi thihchilh bomb a nih thu an tarlang a, Muslim tamna hmun Sulu-a Jolo-ah a ni tih tarlangin helai hmun hi sorkar kaihhruai security force-te'n hun rei tak chhung Abu Sayyaf group laka beihpui an lo thlak tawhna a ni.

Lieutenant General Corleto Vinluan chuan bomb puak hmasa zawkah hian sipai panga leh tualchhung mi pali an tel tih sawiin, supermarket kawta motorcycle dinga improvised explosive device-an dah chu a puak hmasa tih a sawi. He bomb puakah hian sipai 16 leh tualchhung mi 20 vel an hliam.

Bomb hmasa puah hnu lawk hian bomb pahnih a puak leh a, a hmasa puahna bul lawkah hian puakin hmeichhe pakhat thihchilh bomb paiin a tipuak a ni. He hmeichhia hi Police-in an hual a, hetah hian bomb hi tipuakin mi pakhat a thih bakah police officer paruk an hliam a ni.