Belarus President bâng turin phût chhunzawm zel

Belarus khawpui Minsk-a Independence Square-ah Pathianni khan an ram President Alexander Lukashenko bang tura phûtin eptu pawl huaihawtin mipuiten kawng an zawh leh. A hma pawhin President bang tura phût hian kawng an lo zawh fo tawh a ni. 

President duh lohna lantira pungkhawmte hi mi 10,000 vel an ni a, August 9-a an ram President inthlanna neiha Luskashenko a chak danah lungawi loin, inthlanah hian vote tihchingpen a nih thute an sawi. He inthlanah hian kum 26 chhung thuneihna lo chang tawh, Lukashenko chuan vote tla aṭanga 80% chuang a hmu a, eptu hruaitu Svetlana Tikhanovskaya chuan 10% chauh a hmu. He  inthlanah hian indepedent observer an awm loh avangin eptu lam chuan vote a chingpen nasa niin an sawi. 

Tikhanovskaya chuan vote tlate  dik taka chhiar ni se chuan vote tla aṭanga 60%-70% vel a hmuh phak a rin thu a sawi a, inthlan dik lo taka kalpui a nih avanga lungawi lohna lantir chhun­zawm zel a tum thu a sawi bawk. President laka lungawi lohna lantir hi Minsk khua bakah ram chhunga khawpui lian dangahte neih a ni a, an ram ṭhenawm Lithuania-ah pawh  pungkhawmin he hun hi Lithunia President Gitanas Nausėda pawhin a telpui. Inthlan dan felfai tawk lo a awm nia sawi a nih vang hian August 17 khan European Parliament pawhin Belarus president atan hian Alexander Lukashenko chu an pawm theih loh thu thuchhuah an lo siam ve tawh bawk.