Japan PM-in IS vauna tihchhuah a dem

Japan Prime Minister Shinzo Abe chuan Islamist State (IS) firfiakte'n an pawl member pakhat chhuah a nih loh chuan an mihren zinga mi, Japan mi pakhat leh Jordanian pilot te thaha vauna thu an tihchhuah chu thil tenawm tâwp a ni, a ti.

IS hian video thar an tihchhuah­ah, IS bomber, kum 2006-a Jordan sorkarin thi tura a chungthu relsak tawh, Sajida al-Rishawi-i chhuah turin Jordan sorkar an phut thu an tarlang. An thil phut hi tihhlawhtlin a nih loh chuan Japan mi an hren mek, freelance journalist Kenji Goto leh Jordan mi, pilot Maaz al-Kassasbeh-te chu thahah an vau. Firfiakte hian an thil phut tihhlawhtlin nan darkar 24 hun an pe a ni.

Japan PM chuan firfiak pawl thiltih dan chu thil tenawm tâwp a ni tiin, a minister-te zawng zawng chu Kenji Goto chhuah a nih theih dan ngaihtuaha theihtawp chhuah turin a hrilh. Hei bakah hian Jordan sorkar pawh thawhpui turin a lo sawm tawh bawk.

Firfiakte hian video an tihchhuah hmasaah Japan mi pahnih an hrente tilangin, an tlanchhuahna atan Japan sorkar chu dollar maktaduai 200 pe turin an phut. A hnua video an tihchhuah lehah, an mi hren zinga pakhat zawk chu an that tawh tih sawiin, an la kawl mek Goto bakah Jordan mi an hrente thlengna atan hian IS bomber tang mek chu chhuah an phut leh ta a ni.

Kassasbeh hi nikum December 24 khan a thlawhtheihna khalh, F-16 chu Syria hmarlama firfiakte an beihnaa a tla a, firfiak ho hian an man zui ta a ni.

IS-te'n an mi hrente thlengna atana an phut, Rishawi-i hi Iraq mi a ni a, kum 2006 khan Amman-a hotel-a ṭum thum bomb tihpuahnaa a inhnamhnawih avangin thi turin a chungthu relsak a ni. Hotel-a bomb puak vang hian mi 60 an thi a, thi zinga a tam zawk hi Jordan mi an ni.