Pakistan zirtirtute silai kah zirtir an ni

Pakistan hmarthlang lama zirtirtute chu silai kah zirtir an ni a, classroom chhunga silai an ken luh phalsak an ni bawk.

Taliban firfiakte'n December 16-a hmarthlang lam khawpui pawimawh, Peshawar-a sipai school an beih hnu khan venhimna lamah sorkarin chak zawka hmalak tumin a bei a ni. Sipai school beihnaah hian mi 150 an thi a, an zinga 132 chu naupang an ni.

Provincial education minister Atif Khan chuan, "Zirtirtu tinte tana silai ken hi tih ngei ngai a ni chuang lo a, mahse a keng duh an awm a nih chuan sorkar lam chuan phalna a pe zel dawn a ni," a ti.

Provincial Information Minister Mushtaq Ghani pawhin zirtirtute silai kah zirtir an ni tih chu a dik tih sawiin, sorkar lam chuan sorkar school zawng zawngah venghimtu a pe thei lo tih a sawi. "Pro­vince chhunga police-te hi school, college leh university 35,000 vel veng turin an indaih tawk lo a ni. Hei vang hian zirtirtute hi training pek an nih bakah, silai an ken pawh phalsak an ni," tiin a sawi.

Pakistan sorkar hian ramchhunga school hrang hrangah a theih angin venhimna a tichak a, private school-te pawh security guard nei vek turin a ti bawk.

Hetihlai hian Private Schools Teachers Association chuan classroom chhunga silai kenluh phal chu ṭha an tih loh thu an sawi a, association president Malik Khalid Khan chuan, "Kut lehlama pen keng a, lehlama silai keng chungin engtinge naupangte an zirtir theih ang. Zirtirtute'n classroom-ah silai an keng lut a nih chuan naupangte chung­ah nghawng ṭha lo tak a nei thei a ni," an ti.