Taiwan-in naupangte electronic games khelh hun bithliah turin a ti
Taiwan sorkar chuan an rama naupangte'n electronic products- video games khelh leh television enna atana hun an hmang nasa lutuk tihziaawm nan nu leh pate zawm tur thupek a siam.
Nu leh pate chu an fate'n TV en leh video games khelhna atana hun an hman zat bithliah sak turin a ti a, dan thar siamte hi an zawm lo a nih chuan pawisa tam tham tak chawitir theih an ni ang.
Sorkar dan thar siamah hian naupang, kum hnih hnuai lamte chu electronic device reng reng khawih tir loh tur tih a ni a, kum 18 hnuailamte chu vawikhatah electronic products-te hun rei tak chhung an khawih khapsak an ni bawk. Electronic products-te chu vaihlo leh zu te ang bawka an taksa tana thil ṭha loa an dah zingah telh a ni.
Parliament member Lu Shiow-en chuan naupangte chu ṭum khatah electronic device minute 30 aia rei khawih lo tura ven an duh tih a sawi a, mahse dan tharah hian an khawih theih hun chhung erawh bithliah a la ni lo.
Naupangten video games an khelh ṭhinte an addict lohna turin kum 2010 khan China pawhin gaming time bithliahsak turin games company-te tan dan a lo siam tawh bawk a, hun bithliah chin aia rei online game khel ṭhinte hremna pawh siam a ni bawk.