US-in Covid-19 kai Emergency-a enkawl nan plasma therapy pawm

United States President Donald Trump chuan Pathianni khan US Food and Drug Administration (FDA)-in Covid-19 hri kaite emergency-a enkawl nan plasma therapy a pawm thu a sawi.

FDA-in plasma therapy a pawm hi convalescent plasma tih a ni a, Trump chuan hri kaite tana hman theiha a awm chu vanneihthlak a tih thu leh China hri tia a sawi fo laka inven dan tur pakhat a nih thu a sawi. Hri dona kawnga hma an sawn zelna chhan chu an ṭan tlan vang a nih thu Trump chuan a sawi a, hei vang hian Covid-19 vaccine pawh mipui tana hman theih tura peih thuai a nih a rin thu a sawi bawk.

Convalescent plasma hi clinical-a zirchiannaah US dollar maktaduai 48 sen a nih thu President chuan a sawi a, he plasma dawng tur hi mi 1,00,000 chuang an an inziahluh tawh thu a sawi bawk. An zirchianna aṭangin FDA chuan convalescent plasma treatment hi a him tawk leh ṭangkai turin a ngai a, thihna (mortality) thleng thei pawh 35%-a a tihhniam theih an ring tih a sawi. President chuan America mipuite zinga Covid-19 kai enkawl dam tawhte chu an plasma donate turin a sawm nghal bawk a ni.