Donald Trump-a'n a running mate tur a puang

Donald Trump chuan Milwaukee-a Republican party convention ni khatna, Thawhṭanni khan US president inthlan lo awm tur atana a running mate, a vice president candidate atan J.D. Vance a thlang tih a puang.

Kum 78 mi, Trump-a running mate, Vance hi kum 39 mi niin Ohio state senator a ni a, Trump-a dodaltu langsar tak ni ṭhin mah se Trump-a inkharkhip duhna leh America First policy chu a thlawp tawh thung a ni. JD Vance hi right-wing politician niin senator term khatna a chelh mek. Trump sawiseltu zinga a thawm na ber ni ṭhin mah se Trump thlawptuah inletin kum 2022-a Ohio senator inthlanah pawh Trump a thlawpna a dawng a ni.

Vance hi US Marines hlui niin Iraq indonaah khan US tan a lo feh chhuak tawh. Zirna lamah Ohio State University leh Yale Law School aṭangin degree a nei bawk. Vance-a nupui Usha Vance-i pa hi India aṭanga US a pem lut niin a pianpui hming chu Usha Chilukuri tih a ni.

Pennsylvania-a rally a neihna hmuna kah a nih hnu aṭanga ni hnih hnuah Republican National Convention hi ṭan a ni a, Trump pawh a beng hliam plaster-a tuam chungin a inlan a ni. Convention-ah hian party palaite chuan November thlaa US President thlanna neih turah Donald Trump chu an party presidential candidate atan an pawm a ni.

Trump chuan thu lawmawm dang dawn bawkin, President a nih tawh loh hnua thuruk pawimawh la kawl anga an puhnaah thiam lohna a nei lo tiin Florida court chuan Trump laka thubuai thehluh chu a titawp bawk.

Meta-in Trump an hrekna titawp

Social media company, Meta chuan Republican party convention neih hma deuh khan an social media platform - Facebook leh Instagram-a Donald Trump laka khuahkhirhna an siamte chu an hlip vek tih an sawi.

Meta hian kum 2021, January 6-a US Capitol-a tharumthawhna thlentute fakna thu a sawi avangin Trump-a account-te hi tiam chin awm loin a hrek sak a ni. Kum 2023 kumtir lam khan a account khuahkhirhna siamsak chungin an tihnunsak leh a, mahse a post-te chu an thlithlai zui reng dawn tih an sawi. Mahse party convention-ah US presidential candidate atan official-a puan a nih dawn tak avangin, candidate-te chuan ang khat vekin Facebook leh Instagram-te chu an hmang ṭangkai thei tur a ni tiin Trump an hrekna hi an titawp a, hemirual hian inhuatna leh tharum thawhna chawk chhuak thei lam thu sawi khapna policy an neih chuan candidate-te pawh a huam vek tih an sawi.

Elon Musk-a'n Trump super PAC tan sum thawh tum

Billionaire Elon Musk chuan Donald Trump-a super political-action committee (PAC) thar tan USD mtd 45 thawh a tum niin Wall Street Journal chuan a tarlang. Musk hian a hmain Trump PAC tan sum a thawh dawn tih chu a lo sawilang tawh a, mahse Thawhṭannia PAC in sum thawhtu list an tarlanah erawh a la tel lo. He list an tih chhuah hi June thla china thawhtute an ni a, July thlaah Musk hian a pek leh pek loh erawh hriat chian a la ni lo.

Trump super PAC hi May thla tawp lama din chauh kha a ni a, donation thawhtu zingah hian entrepreneur lian tak tak - Palantir co-founder, Joe Lonsdale, Crypto billionaires Cameron leh Tyler Winklevoss bakah, US ambassador hlui Kelly Craft te pawh an tel. PAC hian USD mtd 8.8 an dawng khawm tawh a, mahse heng aṭang hian USD mtd 7.8 an hmang tawh thung.

Elon Musk hian sum a thawh ngei em tih leh a thawh zat chiah sawichian la awm lo mah se, Fortune 100 CEO zingah Republic National Convention ni khatnaa Trump thlawpna lantirtu awmchhun a ni tho a ni. Tesla neitu hian Trump a thlawp thu hi a sawilang hreh lo a, kar liamta Inrinnia Trump-a Pennsylvania-a beih a tawh hnuah khan Trump chu candidate duhthusam a nih thu leh, a dam ṭhat thuai a duhsak thu pawh a sawilang a ni.