Afghanistan-ah thlipui thawk vangin mi 35 an thi

Afghanistan khaw chhak lama thlipui ruahpai tel thawkin chhiatna a thlen vangin mi 35 an thi tih rorelai, Taliban thuneitute chuan Thawhṭanni khan an puang.

Nangarhar province-a information and culture department director, Sediqullah Quraishi chuan thlipui leh ruahsurin chhiatna a thlenna hmunah hian thi bakah hliam tam tak an awm tel tih a sawi. Thi zinga panga hi chhungkaw pakhat, Surkh Rod district-a cheng niin an inchung chimin a delh tih Quraishi chuan a sawi a ni. Quraishi hian thi leh hliam zingah hian nunau tam tak an awm tih tarlangin bungrua leh thlai eng emaw zat Nangarhar province-ah hian tihchhiat a ni, a ti.

World Food Program chuan Afghanistan hmarlam Baghlan province-ah May 9 leh 10 ah ruahsur nasain chhiatna a thlen vangin mi 300 chuangin an thih phah tih an lo tarlang tawh a, chenna in tam tak a tichhia niin an sawi bawk. He chhiatna thleng nghawng hi a na hle a, a damchhuakte pawn chenna tur an neih loh bakah damkhawchhuah nana an mamawh an nei ṭha lo hle tih tih WFP chuan a tarlang bawk.