Israel-in Gaza a beih chhunzawm vangin Hamas-in inbiakna titawp

Israel chuan inkahhai puang tura inbiakna kalpui laiin Gaza Strip chu van, tui leh lei lam aṭanga an beihna an chhunzawm reng a, hei vang hian Hamas chuan inkahhai puang tura inbiakna an neih mek aṭangin an inhnukdawk tih a puang.

Israel chuan Gaza khawpuia Tal Al-Hawa, Sheikh Ajlin leh Al-Sabra hmunte an bei nia tarlan niin Gaza laili laia awm, Nuseirat refugee camp pawh an bei tel niin mita hmutute chuan an sawi. Palestine-a hliam tuar enkawltu pawl, Red Crescent chuan Israel-in van lam aṭanga Al-Maghazi camp a beih hnuah ruang panga an chhar tawh niin an sawi a, heng zinga pathum chu naupang a ni, an ti. Heng bakah hian Israel chuan lawng hmangin Khan Younis an bei nia tarlan niin, Apache hlicopter hmangin Rafah an bei tih tarlan a ni bawk.

Israel sipaite chuan tuipui kam lamah an beihpui thlak chu an chhunzawm zel dawn tih an tarlang. Hemi bakah hian tun hnaia van lam aṭanga Gaza Strip an beih bakah Rafah leh Central Gaza-a an beihpui thlakah helpawl mi leh sa tam tak an thi tih an sawi. An lawng sipaite chuan Gaza a hmun hrang hrang an ralsai ṭhin tih a tarlang bawk.

Hamas lam chuan inbiakna kalpui a nih reng laia Israel-in Gaza a beihna a chawlhsan duh loh avangin inkahhai puang tur leh mi tang chhuah tura inbiakna an neih mek aṭangin an inhnukdawk tih Pathianni khan an puang. Israel in Hamas military wing hotupa, Mohammed Deif thah tuma an kahna lamah mi 92 an thi tih Hamas health ministry in an puan hnu lawkah Hamas hian inbiakna aṭangin an inhnukdawk tih an puang a ni. Hamas lam hian inbiakna aṭangin inhnukdawk mah se Israel-in inremna an duh tak tak a ni tih lantir a, inbiakna chungchanga an thu tak hunah inbiakna hi nei leh turin an inpeih reng niin an tarlang.