Jordan-in mi tang inthleng a remti IS-te'n ni tlak thleng hun an pe

Islamist State (IS) firfiakte'n audio message an tihchhuah tharah, an mi hren mek Japanese jour­nalist chu thu sawi tirin, Jordan sorkarin a rama tang mek, Iraq mi hmei­chhia, al-Qaida member chu a chhuah loh chuan firfiakte'n Jordanian pilot an hren mek chu an tihhlum tur thu a sawi. An thil phut chungchangah hian Jordan sorkar chu nimin tlai ni tlak thleng khan hun a pe.

IS hian Japanese journalist, Kenji Goto Jogo tlanchhuahna atan hian Jordan rama tang mek, al-Qaida bomber Sajida al-Rishawi-i chu chhuah an phut a ni. Audio message an tihchhuahah hian Kenji Goto chuan, "Sajida al-Rishawi-i hi Ningani, January 29 tlai ni tlakah Turkey ramria a awm hman lo a nih chuan Jordanian pilot Mu'adh al-Kasasibah chu thah nghal a ni ang," tiin a sawi. Goto chuan, "Darkar 24 chhung chauh damna hun ka nei tawh a, pilot hian kei aiin hun a la nei tlem zawk a ni," a ti.

He message tihchhuah a nih hnu hian Jordan sor­kar chuan tang inthleng a remtih thu a sawi.

Hetihlai hian IS chuan an huang zauh zel tumin hma an la a, Tehreek-e- Taliban Pakistan thupuangtu hlui, Hafiz Saeed chu Khurasan biala an pawl hotu atana ruat a nih thu video an tihchhuah tharah an puang. Khurasan bial hian Afghanistan, Pakistan leh India hmun ṭhenkhat a huam. Saeed hian kar hmasa khan Taliban aṭanga a inlakhran thu a lo puang tawh a ni.