Hezbollah-te'n Israel sipai 2 an kaphlum

Lebanon-a firfiak pawl, Hezbollah-te chuan Nilaini khan missile hmangin Israel army convoy an kap a, sipai pa­hnih an kahhlum bakah mi dang pasarihin hliam an tuar.

Israel Defence Forces (IDF) thupuangtu, Brig Gen Moti Almoz chuan Lebanon chhim lam aṭanga kahchhuah anti-tank missile hian sipai motor a fuh, a ti a, hliam tuarte chu an ngaihtuahawm loh thu a sawi bawk.

Beih an tawh hnu hian Israel sipaite chuan Lebanon hi ṭum 50 vel an kaplet nghal.

Hezbollah chuan Israel sipaite beitu an nih thu hi an tarlang nghal a, Israel sipaite chuanna motor eng emaw zat an kapchhia tih an sawi. Hezbollah te'n anti-tank missile an kah hnu han, Syria lam aṭangin mortar hmangin Har Dov leh Hermon tlang beih ni zui bawk.

Hermon tlang beih a nih vang hian a hmarlama cheng mi eng emaw zat chu Israel sipaite'n an sawnchhuak a, ramri bula Israel khua Ghajar-a in pakhat kahchhiat a ni.

Israel Prime Minister Benjamin Netanyahu chuan Hezbollah-te chu na takin a chhang let dawn tih a sawi. "Tunah chuan IDF-te'n hmarlama thil thlengte hi an buaipui mek a ni. Hmarlam ramri aṭanga min chotute chuan, Gaza-a thil thlengte ngaihtuah rawh se," a ti. Nikuma Gaza Strip-a Hamas firfiakte laka beihpui an thlak ang bawka beih letah a vau.

Israel leh Lebanon ramria inbeihna thleng avang hian nimin khan UN Security Council chuan emergency meeting a nei a, ram pahnihte inkara boruak chhia tihreh a nih theih dante an sawiho. UN-a Israel ambassador, Ron Prosor chuan Israel-in a ram venhimna turin a ṭul ang apiang a ti dawn tih a sawi a, "Israel chuan Hezbollah te'n Israel mi an bitum chu a thlir mai mai dawn lo," a ti. UNSC chu Hezbollah demna siam turin Israel palaiin a phut bawk.