NKorea-in South nena summit neih nan dollar tld 10 a phut
North Korea chuan kum 2009-a South Korea nena inbiakna an neih theih nan SKorea hnenah pawisa faia dollar tluklehdingawn 10 pe tur leh ei tur ton maktaduai chanve pe turin a phut niin SKorea president hlui Lee Myung-bak chuan a sawi. Mahse North lam thil phut hi an pe duh lo tih a sawi nghal bawk.
Kum 2008-2013 chhunga SKorea President, Lee Myung-bak chuan kar lehaha lehkhabu a tihchhuah turah North Korea chungchang hi a sawilang.
Lee chuan NKorea rawtna hi a pawmsak thei lo a, inbiakna neihpui an tum avanga North lamin hlawkna an lo um vak chu a pawm thei lo tih a sawi. North lam rawtna a pawm loh avang hian Lee hian a president chhung hian North lam hruaitu a hmu lo.
Lee hmaa SKorea president nihna chelhtu, Kim Dae-jung khan kum 2000 khan NKorea hruaitu Kim Jong-il chu summit a lo neihpui tawh a, hei hian ram pahnih inkar boruak pawh eng emaw chen chu a tihṭhat phah nia sawi a ni. Mahse a hnuah Kim Dae-jung hian summit neih theih nan NKorea hnenah dollar maktaduai 500 a pe tih haichhuah a ni a, a hmingṭhatna pawh a tihhliau phah hle.