Sinai bial beihnaah mi 27 an thi

Egypt hmarlama Sinai bial chu Ningani khan Islam firfiakte'n an bei a, mi 27 an thi. Thi zinga a tam zawk hi sipai an ni a, mi 50 chuangin hliam an tuar.

Firfiakte hian North Sinai province khawpui, El-Arish-ah sipai hmun pawimawhte chu car bomb leh rocket hmangin an bei a, hei bakah hian Gaza bula Rafah leh Sheik Zuwayid khuate pawh an bei bawk.

Islamic State (IS) firfiak pawl zawmtu nia insawi, Ansar Beit la-Magdis chuan pawikhawihna hi an thlen niin an sawi. He pawl hian kum 2013-a Egypt President Mohammed Morsi paihthlak a nih hnu khan ram chhungah vawi tam tak pawikhawihna an lo thlen tawh a ni.

Security official-te chuan firfiakte hian police office, military base leh military hotel-te chu rocket hmangin an kap hmasa a, a hnuah military base gate bulah car bomb an tipuak leh niin an sawi a, khawpui chhunga army checkpoint eng emaw zat an bei tel bawk.

Nikum October thlaa sipai checkpoint beih a nih avanga sipai tam tak an thih hnu aṭang khan North Sinai-ah hian state of emergency puan chhunzawm reng a la ni.

Pawikhawihtu nia insawi, Ansar Beit la-Magdis hi al-Qaida aṭanga indin ni mah se, a hnuah IS lam hi an thlawp a, Morsi-a paih­thlatu, President Abdul Fattah al-Sisi dodalna lantir turin Egypt mipuite an lo sawm tawh a ni.