EU-in Russia hrekna a pawtsei
Brussels-a European Union (EU) foreign minister inhmukhawmte chuan Russia hrekna hman mek chu kumin September thla thlenga pawhsei an remti.
Meeting-ah hian minister-te chuan EU-in mimala a hrek, an zinchhuah a khapsak leh an thil neihte khawih chet theih loha a dahsakte hming pawh sawi hoin, list-ah telh an remti bawk. Russia hrekna pawhsei hi remti mah se, a hrekna dang erawh siambelh a ni lo.
Hetihlai hian Ukraine khawchhak lamah helho leh sipaite an la inbei chhunzawm reng a, kar kaltaa Mariupol-a inbeihna thlengah mi 30 an thi. Ukraine aṭanga inlakhran duha helte hi Russia-in a thlawp a, Nato chuan Ukraine khawchhak lamah Russia tank leh sipai motor ṭhahnem tham tak a awm niin a sawi a, mahse an puhna hi Russia chuan a pha thung.
Russia chuan helhoin inlakhran tuma Ukraine sorkar an beihnaa a inrawlh lo tih a sawi a, hemi rual hian Russian volunteer ṭhenkhat erawh chuan helte hi an pui niin a sawi.
Nikum April thlaa helhoin khawchhak lama Luhansk leh Donetsk bial an lak hnua tualchhunga inbeihna thleng vangin mi 4,800 vel an thi tawh a, mi maktaduai 1.2 chu himna zawngin hmun dangah an tlanchhe tawh bawk.