MH370 zawn hna tihtawp a ni

Malaysia sorkar chuan nikum March 8-a Kuala Lumpur leh Beijing inkara a thlawh laia chin hriat loha awm, Malaysian Airlines Flight MH370 zawn hna chu Ningani khan official-a tihtawp a ni, tih a puang.

Malaysia Civil Aviation Authority chuan flight MH370 hi chesualin a tla tih a puang a, he thlawhtheihnaa chuang mi 293 chhungte chuan zángnadawmna an dil thei tawh dawn a ni.

Thlawhtheihna bo hi Australia khawthlang lam, Indian Ocean chhim lamah a tla nia rin a ni a, nasa taka zawngin a zawnnaah hian Malaysia bakah China leh Australia pawhin theihtawp an chhuah a ni tiin, civil aviation hotu Azharuddun Abdul Rahman chuan a sawi.

Rahman chuan thlawhtheihna zawngtute hian an theih ang zawng zawngin hma an la a, data awm theite pawh ennawn vek niin Indian Ocean chhim tawp thlengin an zawng a, mahse an hmu zo ta lo a ni, a ti.