Bangladesh : University zirlaite lungawi loh lantirnaah mi 6 an thi

Bangladesh-in kum 1971 a zalenna a sual laia an ram tana beitu, sipai chhungte tan sorkar hna 30% sorkarin a hauhsak tihtawp phutin ramchhunga university zirlaite chuan nawrh an huaihawt. Nawrh huaihawtnaa buaina chhuakah zirlai paruk an thi tawh a ni.

Zirlai lungawi lote chuan quota an siam dan chu thleibik nei a ni tiin hna lak kawngah a tiṭha apiang lak chu an duhdan a nih tih an tarlang. Zirlaite hian univeristy campus bakah ramchhung hmun hrang hrangah, kawngpui leh rel kawng dangin lungawi lohna hi an lantir bawk.

He reservation policy hi Bangladesh prime minister ni lai, Shiekh Hasina thlawptute tan hamṭhatna a thlen niin an sawi a, hei hi zalenna sual kha an party Awami League kaihhruaina hnuai neih a nih vang a ni. Zalenna sualtu chhungte tana sorkar hna 30% hauh a nihna hi kum 2018 khan zirlaite nawrna avangin court chuan a pawm lo a, mahse thla hmasa khan Bangladesh High Court chuan he thutlukna hi sut lehin quota hman dan chu a pangngai anga kalpui leh turin a ti.

Bangladesh police chuan July 15, Thawhṭanni khan Dhaka University-ah intihbuaina a chhuak tih tarlangin, mi 100 chuangin hliam an tuar tih an tarlang. Hemi hnu hian Jahangir Nagar University-ah buaina dang chhuak lehin mi 50 vel bawr hliam tuar an awm leh bawk. Zirlai zingah quota siam dan phung duh leh duh lo inkarah buaina hi a chhuak ṭhin a ni.

Bangladesh prime minister Shiekh Hasina chuan kum 1971 kuma ram tana zalenna sualtute inpekna sawi langin, anmahni hmachhawp leh thil tumte an kalsan a, an chhungte leh an neih zawng zawng kalsanin zalenna suala indonaa tel turin an ralthuam neih angte kengin an pen chhuak tih a sawi. An inpekna vangin zahna sang ber an phu a, eng political party pawh zawm se zah an phu reng a ni, a ti.

Bangladesh University Grants Commission chuan sorkar leh mimal enkawl university-te chu thu leh awm hma chu class kal pui lo tur leh an campus chhunga chengte sawn chhuak turin a hriattir. Thuneitute chuan lungawi lohna lantir vanga thi zat hi mi paruk an ni tawh a, Dhaka, Chattogram leh Rangpur-ahte tharum thawhna a thleng tih an sawi.