Inkahhai rawtna pawm turin Hamas leader an nawr : CIA Director

Gaza Strip-a Hamas political chief, Yahya Sinwar chu an mi leh sate Israel nen indona titawp a, inkahhai puang tura rawtna pawm turin an nawr niin CIA Director Bill Burns chuan a sawi.

American intelligence official-te chuan Sinwar hi Khan Yunis-a leiverh eng emaw berah a biru mek niin an ring a, Israel nena an inkahhai puanna tur leh, tang inthleng dan chungchangah Hamas tana thutlukna siamtu ber nia sawi a ni bawk.

Israel ram tan-ina Shinwar a tan laia thu zawttu ber, Shin Bet senior official hlui Micha Kobi chuan tang inthleng chungchangah tumahin Sinwar thutlukna siamah an inrawlh ngam lo tih a sawi. Hamas hruaitu ni mah se, thutlukna siam kawngah ram pawn lamah Hamas hruaitute thurawn a ngaithla ngai lo a ni, a ti bawk.

Kobi chuan Sinwar hi underground tunnel-a a bihruk tlat avangin biakpawh hleih theih a ni lo a, Hamas tana thutlukna siamtu a nih avangin a remtihna a ngai zel a, hei vang hian inbiak pawh a harsa niin a sawi. Hei vang hian Israel leh Hamas-ten tang inthleng tura inbiakna an neih pawh hmasawn a harsat phah niin a sawi bawk.

Hetih lai hian Hamas lam hian Israel-in Gaza Strip a beihna a chhunzawm zel avangin inkahhai puanna tura inbiakna aṭangin an inhnukdawk tih an lo sawi tawh a ni.