IS-in Oman-a mosque beitu an nih thu sawi

Oman khawpui, Muscat-a Shia Muslim mosque chu Thawhṭanni zan khan firfiakten an bei a, mi paruk an thi a, hliam 28 an awm bawk. Thi zingah hian police pakhat a tel. Security force-te chuan mosque beitu mi pathumte chu an kap hlum ve nghal a ni.

Islamic State (IS) firfiak pawl hnuaia Sunni Muslim jihadist group chuan Thawhlehni khan Oman mosque beitu an nih thu hi an sawi a, an Telegram site-ah mosque beih lai video pawh an rawn dah a ni.

IS hian Iraq, Afghanistan leh Pakistan-ah Shia ho hmun pawimawh leh an thil lawmna hmunte an lo bei fo tawh a, Oman-ah erawh pawikhawihna hi an la thlen ngai lo.

Mosque beihnaa thi zingah hian Pakistan mi pali leh India mi pakhat an tel. Pakistan prime minister Shehbaz Sharif chuan he pawikhawihna thleng hi a dem thu leh, thi chhungte a tawrhpui thu a sawi. Pawikhawihtute chhuina kawngah Pakistan chuan Oman sorkar chu a theih anga a puih zel tur thu a sawi.

Oman hi Middle East ramah pawh boruak ṭha leh him ber ram zinga sawi a ni ṭhin. An ram mipui hi maktaduai 4.6 vel niin, 40% chuang chu foreign worker an ni. Sorkar hian sakhaw hrang hrang zuitu awm zat hi a tarlang lo a, mahse US state department chuan Oman mipui zinga 95% chu Muslim niin, heng zinga 45% chu Sunni, 45% chu Ibadi leh 5% chu Shia Muslim tih a sawi. Mipui 5% chu Hindu, Buddhist leh Kristiante an ni ve thung.