US Senate-in Silai khuahkhirh rawtna a hnawl

US senate chuan silai khuah-khirhna bill put luh chu a hnawl. Orlando-a silaia inpawngkahna thlen hnuah silai khuahkhirh duhna hi a lian zual hle a, hemi kal zelah US Senate-ah hian silai khuahkhirh rawtna hi lutin, Republican member tam zawkna, US Senate chuan a hnawl ta a ni.

Silai khuahkhirh rawtna hi Democrat Party chuan pahnih a chhawp chhuak a, Republican Party lamin pahnih bawk an chhawp chhuak a, mahse an in pharthlaksak ve ve a ni.

Democrats lam hian FBI-in a enthlak mek te chu silai lei phalsak lo tura rawtna leh, pawikhawihnaa lo inhnamhnawih tawh ṭhin leh, rilru lama hrisel lohna nei an nih leh nih loh uluk taka enfiah phawt an rawtte chu hnawl a ni a, Republican lam chuan US Constitution, Second Amendment khawih thil a ni an ti.

Republican lamina an rawt, FBI-in a enthlak mekte chu silai an lei dawn pawn darkar 72 chhung tal nghahtir a, an nghah chhunga lei phalsak an nih tur leh tur lohah sorkarin court a rawn hman theih nan tih leh, a lei tumte an mizia leh khawsakphung zirchian lehzual chu Democrats lamin an hnawlsak ve bawk. Silai lei tum chu firfiaka chetnaa inhnamhnawih thei ngeia ngaih a nih chuan, he dan hi lo tihlawhtling ta se, a lei hrim hrim pawh khap theih a ni dawn a ni.

Texas-a Republican senator John Cornyn chuan, "Senator tinte chuan firfiaktena pawisawilo mipuite beih nana an hman ṭhin avangin firfiakte kuta silai a luh loh an duh vek a, mahse thil ti turin kawng dik a awm a, chutiang bawk chuan kawng dik lo pawh a awm a ni," a ti. Democrats lam mi, Dick Durbin chuan, "Zanin hian Senate chuan Orlando aṭanga San Bernardino-a silaia inpawngkahna tuarte chu a hnuchhawn a ni," a ti.