JD Vance-a'n Republican vice president candidate tura rawtna pawm

US President inthlan neih tura Republican presidential candidate, Donald Trump-a'n a vice president candidate tura a ruat, James David Vance chuan Republican National Convention (RNC), Milwaukee, Wisconsin-ah neiha a pawm thu Nilaini zan khan a puang.

Ohio Senator, JD Vance chuan Donald Trump chu fakin, America mite tana beiseina awmchhun a ni tawh a ni, a ti. Vance hi a hmaa Trump sawiseltu langsar tak a ni ṭhin a, 'American Hitler' ti tein a lo sawi tawh a ni. Mahse Trump-a inkharkhip duhna leh America First policy avangin a ngaihdan hi thlakin a thlawp leh ta zawk a ni. Convention-a thu a sawiah, Vance chuan US tana Trump hmathlir chu thil awlsam leh thiltithei tak si a ni, a ti.

Vance hi kum 39 mi a ni a, November inthlana an chak a nih chuan US chanchina vice president ni thei naupang ber zingah a tel thei dawn a ni. A nupui Usha Vance hi lawyer a ni a, India aṭanga pem lut thlah a ni. Politics lamah hnuhma lian a la nei lo a, mipui nawlpui pawhin an la hriat lar lutuk loh niin, Senator term khatna a hmang mek chauh a ni. Hetih lai hian vice-presidential candidate te hian President thlannaah nghawng lian tak a neih a rinawm lem lo.

Nilaini zana RNC-ah hian Donald Trump-a tunu, kum 17 mi Kai Trump pawhin thu a sawi ve a, a pu nena an chanchinte a rawn sawi. Mipui lamin an ngaihven loh, pu a nihna anga a tute a hmangaih leh a duat dante sawiin, America ram tana thil ṭha ber duh thu leh, America ropuina tura a beih thute a sawi.