President Joe Biden-a'n Covid-19 hri a kai; President candidate aṭanga inhnukdawk turin an nawr zel

US President Joe Biden chuan Covid-19 hri a kai a, hei vang hian November thlaa US President thar thlanna neih tura a campaign pawh a chawlh lailawk a ngaih phah.

Kum 81 mi ni tawh, Biden hian Covid-19 hri a kai thu hi Nilaini khan puan a ni a,a la na hran lo a, mahse Delaware-a a inah a inkhung rih dawn a, helai hmun aṭang hian hna pawh a thawk rih dawn tih a press secretary, Karine Jean-Pierre chuan a sawi. President Biden hian Covid vaccine leh booster te pawh a la tawh niin a sawi bawk. A hmain Covid-19 hri hi vawi hnih a lo kai tawh bawk a ni.

November thlaa inthlan neih turah Joe Biden hi Democrats presidential candidate tur a ni a, mahse thla hmasaa Republican presidential candidate, Donald Trump nena debate an neihah a chet ṭhat loh em avangin Democrats party mi leh sa tam takin official-a an party candidate tura puan a nih hma ngeia inhnukdawk turin an ngen a, heng zingah hian party hruaitute pawh an tel.

US Congress-a Democrats hruaitu pahnih, Senate Majority leader Chuck Schumer leh House Minority leader Hakeem Jeffries-te chuan a hran ve vein Biden hi an lo kawm tawh a, presidential candidate aṭanga inhnukdawk tur hian an ngen nia sawi a ni. House Speaker hlui, Nancy Pelosi pawhin November inthlanah Donald Trump a hneh theih a rin loh thu mimal takin a lo hrilh tawh bawk.

Biden hian a hmain US President chuh a tumna aṭanga inhnukdawk tur chuan Pathian chauhin a rilru a hmin thei ang tiin lo sawi tawh a ni. BET in a kawmnaa pawh an mi leh sate inlungrual lo tak chung chuang hnehna a chan theih a rin loh thu a sawi a, hemi rual hian a doctor-ten a hriselna dinhmun lam a ngaihtuahawm dawn nia an sawi a nih chuan inthlan chuh a tumna chu a ngaihtuah ṭha chauh ang tih a saw ileh.

Tu in nge Biden thlak ang?

Joe Biden hi Democrats presidential candidate a nihna aṭanga a inhnukdawk a nih chuan, party nominee thlangtu delegate ten a aiawhtu tur hi an thlang leh dawn a ni.

Party nominee tur hi state hrang hrangah primary election hmangin party delegate-ten an thlang a, primary election-ah hian Biden chuan delegate 4,000 dawn aṭangin vote 99% zet a hmu pha a ni. Heng delegate-te hian President ṭanglai chu thlawp turin an intiam a ni. Democrats hian August 19-22 hian Chicago-ah Democratic National Convention (DNC) an nei dawn a, he hunah hian official-in party nominee hi an thlang dawn a, hetah hian Biden vote-tu delegate-te hian an thlawp leh dawn avangin convention neih hma ngeia inhnukdawk tura Biden nawrna hi a nasa tawh hle a ni.

President Biden hi a inhnukdawk a nih chuan, convention-ah hian delegate-ten candidate dang an duh an thlang thei dawn a, majority vote hmu chu official candidate a ni thei dawn a ni. Mahse a thlaktu tur hi tunge ni ta ang tih erawh sawithiam a har rih hle ang. Mi tam tak chuan a vice president candidate, Kamala Harris an sawi ri a, hetih lai hian Democrats hruaitu zingah candidate atana duh dang pawh an awm nual. Kamala Harris hi America mipui nawlpuiah a tla na lutuk lo a, FiveThrityEight in mipui ngaihdan a lak hnuhnung berah pawh a duhtu hi 37% an nih laiin duh lotu hi 51% an awm thung. Biden inhnukdawk ta se, a aia Democrats presidential candidate atana an sawi rik zingah hian Michigan Governor Gretchen Whitmer, California Governor Gavin Newsom, Transportation Secretary Pete Buttigieg, Pennsylvania Governor Josh Shapiro leh Illinois Governor JB Pritzker te pawh an tel.