Trump-a'n Republican presidential candidate atana rawtna a pawm

US president hlui, Donald Trump chuan Republican National Convention tawp zan, an ram huna Ningani zanah khan kumin November 5-a US President thlanna neih tura Republican presidential candidate atana an nominate-na a pawm.

Election campaign a neihnaa thah tuma beih a nih aṭanga ni ruk hnuah, Trump hian RNC tawp zanah hian President candidate atana party-in an nominate-na a pawmna thu hi sawiin, darkar khat leh minute 32 chhung thu a sawi. Kum 1976 hnua acceptance speech neih tawhah thu sawi rei ber a ni. Kum 2016 khan darkar khat leh minute 15 leh, kum 2020-ah darkar khat leh minute 10 chhung thu a lo sawi tawh bawk.

Kum 78 mi, Trump hian a beih a tawh chungchang sawi hmasa berin, tlemtein a lu kha lo thlesawn hlek lo se chuan an hmaa ding tur a awm tawh dawn lo tiin a sawi a, Pathian khawngaihna avang chauha tun dinhmun thleng a ni thu a sawi a, kalkhawmte rilru pawh a khawih hle. An khawtlanga inṭhenhranna tam lutuk chu tuamdam a ngai tawh tih sawiin, American a nih angin tum leh duh thumun neia an din chhuah a ngai a, chutianga an ṭangrual lo a nih chuan an tlusawp thuai dawn niin a sawi.

'America mi zawng zawng tan President nih tumin ka chuh a ni. Mipui chanve tan chauh hnehna a awm thei lo," tiin, ṭum danga a thusawi ṭhin aiin a ṭawngkam chhuak pawh a nem zawk a ni. A campaign auhla pakhat, dan loa US-a pem lutte chungchang pawh sawi chhuak lehin, dan loa Mexico aṭanga US-a lutte chu an ram rûntu niin a sawi. Sumdawnna lamah pawh chhiah lak dan thar a siam tur thu leh, 'America first' foreign policy kalpui a tum thu a sawi bawk. RNC tawp zana a thusawiah hian Trump hian ṭum danga a beih vak ṭhin leh, Democrats presidential candidate leh US president nilai, Joe Biden pawh a sawichhe vak lo a, 'current administration' ti chauhin a sawilang a ni. 'America ram ropui kan siam leh ang' tiin a thusawi hi a titawp.

Milwaukee, Wisconsin-a RNC tawp zanah hian Trump-a nupui, Melania Trump pawh convention neih chhunga a vawi katna atan a inlan. Kumina Trump-a campaign neih lianthama a inlan vawi khatna a ni bawk.