Bangladesh : Buaina vanga thi zat an pung

Bangladesh sorkarin hna a lak tura zalenna sualtu chhungte tana 30% hauhsak a tumna chu duh loin ramchhung university hrang hrangah zirlaiten lungawi lohna an lantir chhunzawm zel a, police leh sorkar thlawptu zirlai ṭangrual leh nawrh huaihawttute inkara buaina chhuak vangin mi 28 an thi tawh nia tarlan a ni.

University zirlaite leh police inkarah Ningania buaina chhuak vangin Dhaka-ah mi 19 thiin, ramchhung hmun danga thi zat nen mi 28 an tling tawh niin tualchhung chanchinbute chuan an tarlang a, hliam tuar mi 100 chuang an awm nia tarlan a ni bawk. Hetih lai hian thuneitute lam chuan thi leh hliam zat hi an puangzar lo thung.

Bangladesh-ah hian sorkar hnaa zalenna sualtu chhungte tana 30% hauhsak duh loh lantirna hi kar engemaw zat buaina chhuak loin kalpui a ni tawh a, mahse tunkar Thawhṭanni khan Dhaka University-a zirlaite inkarah buaina a chhuak a, hemi hnu hian ramchhung hmun hrang hrangah zirlai, sorkar thlawptu leh police ṭangrual leh zirlai nawrh huaihawttute inkarah tharum thawhna a chhuak ta a ni. University thuneitute chuan sorkar leh mimal enkawl zirna-inte chu khar lailawk turin thurawn an pe a ni.

Bangladesh law minister, Anisul Huq chuan nawrh huaihawttute chu inbiakna neihpui turin prime minister Sheikh Hasina chuan thurawn a pe tih sawiin ani pawh inbiakna nei turin a inpeih tih a sawi. Mahse nawrh huaihawttute chuan rampum huap, bandh huaihawt an tum tih Nilaini zan khan an puang a, hemi hnu hian Bangladesh-a eptu pawl lian, Bangladesh Nationalist Party chuan bandh chu an thlawp tih an sawi ve bawk. Ningani khan bandh chu kalpui tumin zirlaite chuan hma an la a, anmahni dodal turin police leh sorkar thlawptu zirlaite chuan hma la ve bawkin an inkarah tharum thawhna a chhuak a, thi zat an pun belh phah ta a ni.