Israel Parliament-in Palestine ram a pawm thei lo

Israel Parliament, Knesset chuan Israel ramchhunga Palestinian state din a nih chuan buaina tam zawk a thlen dawn tiin Palestine ram duh lohna resolution an pawm.

Prime minister Benjamin Netanyahu chuan US Congress-ah thusawi turin Washington a pan dawn a, hemi hma hian Israel chuan Palestinian ram din tumna chungchanga an ṭanhmun tilang turin resolution hi an parliament-ah an pu lut a, an pawm a ni. Hemi bakah hian International Court of Justice-in Israel in West Bank a awpna chu a dik tawk em tih chunchanga zawhna a siam chhanna atan resolution hi Israel chuan a hmang niin a ngaih theih bawk.

"Knesset chuan Jordan thlang lama Palestinian ram din tumna hi a pawm thei lo a ni" tiin resolution-ah hian a inziak. West Bank leh Gaza Strip chu indona vangin a chhe hneh hle niin a inziak bawk. Israel ramchhunga Palestine ram din a nih chuan Israel ram leh mipuite tan a hlauhawm thei dawn nia tarlangin, Israel-Palestinian inkarah buaina nasa zawk chhuakin Middle East chu tun aia ralmuang lo zawkah a dah thei dawn nia tarlan a ni. Palestinian ram din a nih chuan Hamas in thuneihna an hnehchhuh anga, Israel nen indona an chawkchhuak leh dawn niin resolution-ah chuan an tarlang tel bawk a ni.