Biden inhnukdawk tura duhtu an pung zel

US President inthlan chuh tura Joe Biden duh lotu an pung zel a, kar liamta Inrinni khan Democrats hruaitu 35 chuan Biden hi inhnukdawk mai se an duh tih an sawi. Heng zingah hian House of Representatives leh Senate-a Democrats member-te an tel a ni.

Joe Biden awmna party a mipui aiawha US Congress a ṭhute mai bakah hian Associated Press in survey a neih aṭanga a lan danin Democrats party mi leh sa zinga 65% zet chuan Biden hi inhnukdawk turin an duh nia tarlan a ni. He survey hian Biden chu Trump aiin dikna ngaina zawk angin tarlang mah se Trump chu inthlana chak zawk tura rin niin, buaina hmachhawn kawngah pawh a rintlak zawk nia ngaitu an tam tih tarlan a ni bawk.

Democrats party mi leh sate zingah Joe Biden rin lohna a lian zel a, hei hi Trump nen debate an neih ṭuma a chet ṭhat loh vang te, hemi hnu lama chet sualna a neih fo bakah a kum a lo tam tak avangin inthlan chuh lo tura duhna thawm a ring sawt hle a ni. Democrats party chuan Donald Trump hneh thei tura an rin candidate neih an duh nia tarlan ni mah se Covid-19 kai vanga Delawware a enkawl mek, Biden erawh chuan President inthlan chuh a tum loh thu hi a la sawi lo thung. Biden hian president inthlan hi chuh dawn lo pawh ni se Biden thlaktu tur hi a chiang lo a, vice president Kamala Harris chu candidate atan Democrats chuan an hmang ang nge, August thlaa convention an neih hmain 'mini primary' an nei dawn tih a la chiang lo a ni.

Trump acceptance speech thlirtu an tam

Democtrats party lamin an party presidential candidate chungchangah buaina an neih mek laiin, Republican party chuan 2024 Republican National Convention, Milwaukee-ah Donald Trump chu an party official candidate atan an puang fel tawh thung.

Kar liam ta khan RNC hi neiin, convention tawp zan, an ram huna Ningani zana Trump-a'n candidate atana an rawtna a pawmna thu, acceptance speech a neih chu RNC neih tawhah thlir hlawh ber niin, entu an tam ber laiin mi mtd 28.4 an thlir a ni. Trump hian darkar khat leh minute 32 chhung thu a sawi a ni.