Bangladesh SC-in quota siam dan a tidanglam

Bangladesh tualchhung buaina chhuah chhan, sorkar hna laknaah zalenna sualtu chhungte tana 30% hauhsak tura High Court rorelna chu Bangladesh Supreme Court chuan hnawlin, hna laknaah 93% chu hauhsak bik awm loin a tiṭha te chanpual tur a ni, a ti.

Bangladesh High Court chuan thla hmasa khan 30% reservation siam hi pawmin zirlai zingah duh lo an tam hle. Hun rei tak chhung buaina chhuak loin lungawi lohna lantir mah se kar liamta Thawhṭanni khan Dhaka university-a buaina chhuak chu ramchhung hmun dangah kangkaiin, zirlai court thupek dodaltute leh zirlai sorkar lamṭang leh police ṭangrual inkarah tharum thawhna a chhuak ṭhin a ni. Tualchhung chanchinbu chuan buaina vanga nunna chan hi mi 144 an tling niin a tarlang.

Supreme Court hian quota chungchanga thutlukna hi nimin khan a tichhuak a, hei hi zirlai lungawi loten an dawnsawn dan tur hi hriat a la ni lo. Bangladesh sorkar chuan SC-in quota chungchang a ngaihtuah dawn avang hian curfew puangin sipaite chuan Dhaka khawpui fang kualin venhimna pawh an uluk hle a ni. Hemi bakah hian kar liam ta Ningani aṭang khan internet leh SMS service chu tihtawp a ni bawk.