Hmun hla zawk kah theihna ralthuam kan mamawh : Ukraine President

Ukraine President Volodymyr Zelenskyy chuan Russia-in bomb leh drone hmanga a beihna chhan let nan hmun hla zawk kah theihna tur, long-range weapons an mamawh tih a sawi.

Russia hian kar hnih liam ta chhung khan Ukraine khawpui, Kyiv chu ṭum nga ngawt drone hmangin a bei a, Ukraine air defence system chuan drone in pawi a khawih hmain a kap thla hman niin Ukraine sipaite chuan an tarlang. Zan khat chhungin Russian drone 35 leh cruise missile pahnih an kap chhe hman niin an sawi a, heng ralthuamte hian Ukraine ramchhung hmun 10 lai a bitum niin an sawi bawk. Hetiang hi thil thlen dan a nih avangin Ukraine chuan Russia ralthuamte hi an air base-ah tihchhiat a ngai tih sawiin hmun hla zawk kah theihna an mamawh tih a sawi.

Ukraine air force chuan Russia-in ballistic missile pathum an kap chhuak tih tarlangin, khawi hmun nge an kah tih leh chhiatna a thlen em tih erawh an tarlang tel lo thung. Sumy region thuneitute chuan Shostkynskyi district-ah Russia hian civil infrastructure an kap chhia tih an tarlang ve bawk. Russia chuan Ukraine hi missile leh drone hmangin a bei tih a la puang lo a, hetih rual hian Ukraine a bei a nih pawhin civil mite hmunhma a bei ngai lo niin a tarlang thung.

Ukraine President chuan Russia chu hmun hla zawk aṭanga kah phal turin khawthlang ramte chu a ngen a, Russia kah theih chin an bituk hlip turin Britain chu a ngen a, hetiang tur hian an ṭhianṭha ram dangte pawh hmin tum turin a ngen bawk. NATO ram zinga ṭhenkhat chuan Ukraine ralthuam a pekte chu Russia ramchhung kah nan hman a phal lo a, heng zingah hian US pawh telin an ralthuam pekte chu Russia ramri kah nan bak hman a phal lo a ni.