Trump-a'n Clinton-i Kristianna a ringhlel

Republican Party aiawha president chuh tur Donald Trump chuan a khingpui tur anga lang Hillary Clinton chu eng sakhua nge a nih zawtin, Kristian a nihna hmuh leh hriat tur a awm lo niin a sawi.

Evangelical Kristian hruai-tute nena an inkhawmnaah Donald Trump chuan mipui hmaah hunrei tak chhung a inlan tawh a, a thlarau lam nun erawh mipuiten an hre tlem hle tih sawiin, eng ang Kristian nge a nih chiah tih a zawt a ni. Trump chuan, "Sakhuana lam thilah chuan Hillary chungchang hi engmah kan hre lo a ni," a ti. Thawhlehni khan Trump leh US-a conservative Kristian hruaitu thiltithei tak takte chu Times Square, New York-a Marriott Marquis Hotel-ah an inkawm a, hetah hian Clinton sakhuana chungchang hi a sawi chhuak a ni.

Trump-a'n Clinton-i sakhuana chungchanga zawhna a siam hi World Evangelical Association-a an hruaitu Deborah Fikes chuan chhâng lêtin, "Hillary Clinton-i hi rinna nei mitena an thlir rawn hruaitu a ni," a ti. Fikes hi UNO-a World Evangelical Association aiawha ṭhu a ni a, he pawlah hian khawvel hmun hrang hranga kohhran pawl 129 an tel.

Fikes chuan, "Republican party aiawh tura ngaih Donald Trump hian tunlai hian ṭawngkam dêngkhâwng tak tak a hmang nasa hle a, hmeichhia a nuihsawh thûl, Latino mite leh rualbanlote thlengin a sâwt a ni," a ti a, "A chângin he rama Muslim-te an luh ve khapsak te a sawi chhuak fo a, khawpui hrang hranga Muslim chêngte enthlak leh enzui a tiam bawk. Evangelical Kristian ka nihnaah, hetianga sakhaw zuitu tlem zawkte hlauhna leh tihṭhaihna pung mêk hian nasa takin min tibuai a ni," a ti.

Kumin November thlaa US president thlan hun atan Trump leh Clinton-te hi an ṭang na sawt hle a, mipui ngaihdan lakah chuan Clinton-i dinhmun a ṭha zawk a, mahse Trump-a dinhmun pawh a sang chak hle.