Alexi Navalny tûr hmanga hrai ngei a ni : Germany

Germany sorkar chuan Russia  President Vladimir Putin sawiseltu langsar, eptu hruaitu Alexi Navalny chu tûr chi khat,  Soviet-style Novichok nerve agent hmanga hrai ngei a ni tih a sawi. 

Germany sorkar thupuangtu, Steffen Seibert chuan an ram military  laboraty-ah an endiknaah, Alexei Navalny chu Novichok hmangin hrai a ni tih an finfiah thu a sawi. Hei hi kum hnih liamtaa Russia phatsantua puh, Britain rama tlanchhia spy hlui  Sergei Skripal leh a fanu hrai nan khan hman a lo ni tawh bawk. Novichok hi nerve agent hlauhawm tak zinga mi, kum 1970 leh 1980 chho veka Soviet Union sipaiten an siam nia sawi a ni. 

Seibert chuan hemi chungchang hi EU leh NATO te pawh hriattir an tum tih sawiin, Russia insawifiah dan azirin hma lak dan turte an la sawiho dawn tih a sawi. 

Russia hi kum ruk liam taa Ukraine rama Crimea bial a luahsak avangin khawthlang ramten an la hrek mek a, Navalny chungchang avanga EU leh US in an hrek belh leh a nih chuan an ram economy in a tuar hle tawh rin a ni. 

Kum 44 mi, Navalny hi August thla khan Siberia aṭanga Moscow a pan tur chu airport-a thingpui a in hnuah thlawh­theihnaah nikhaw hre loin a awm a, Omsk-ah emergency-in an ṭum a ngaih phah a ni. Hemi hnu hian Ger­many-ah enkawl tura hruai a ni. 

Test neih sak a nih hnuah chemical nerve agent hmanga beih a ni ngei tih Germany foreign minister Heiko Mass chuan a sawi a, Russia hnenah hemi chungchang hi chhui chiang turin a phut bawk.