NKorea-in missile a enchhin

Nilaini zing khan North Korea chuan missile a enchhin a, ram hrang hrangin an sawisel nasa hle a, US chuan UN dan bawhchhiat a ni chu a dem thu a sawi chhuak.

Tunhnai mai aṭang khan NKorea hian intercontinental ballistic missile (ICBM) siam chhuah kawngah nasa takin hma a sawn a, heng ICBM te hi a hmawra nuclear bomb vuah theihte an nih avangin US chuan a ngaimawh lehzual hle a ni. Nilainia NKorea-in missile a test hi Musudan a ni a, km 2,500 aṭanga 4,000 thleng kap pha niin, Pacific chhim lama US sipai hmun Guam pawh kap pha tura ngaih a ni.

SKorea sipai thupuangtu chuan, Musudan hi NKorea vaukam chhak lam aṭangin kah chhuah a ni a, ṭum hnih kah chhuah a ni a, a hmasa zawk chu a hlawhchham a, a vawi hnihna erawh hlawhtling taka kahchhuah a ni thung niin a tarlang.

US state department thupaungtu John Kirby chuan UN phal loh chunga NKorea-in missile a enchhin chu na taka sawiselin, khawvel pumten nasa zawka NKorea hi an dodal a ngai a ni a ti a, UN-ah pawh he thu hi thlen ngei tum a nih thu a sawi bawk. Japan prime minister Shinzo Abe chuan missile enchhin chu pawmdam leh pawmzam mai theih a ni lo a ti bawk. NKorea hian US ram kap pha missile neih tumin hma a la nasa hle. Pentagon chuan tun ṭuma missile test hi North America tan chuan a hlauhawm pha rih lo niin a sawi.