Iraq sipai-in Fallujah an hnaih zel

Iraq sipaiten IS kut aṭanga Fallujah khawpui leh a chhehvel lalet tura an beihnaah hma an sawn a, Fallujah khaw bula hmun pawimawh tak tak pahnih an la let thei.

Iraq-in firfiakte bei tur bika a din sipaite chuan Fallujah hmarchhak biala Shurta police district an la a, Baghdad aṭanga beihpui thlakte chuan Askari military hmun an la let bawk. Islamic State-te hian Fallujah hmar lam, Jughafi district te, Golan bial leh, Tigris lui thlang lamte an thuhnuaiah an la dah a ni.

Fallujah lalet tur hian Iraq sipaite chuan chawlhkar nga an bei tawh a, he inbeihna avang hian mi 85,000 chuangte chuan khawpui hi chhuahsanin, sorkarin hmun a buatsaihah an tlan lut a ni. Iraq prime minister Haider al-Abadi chuan Mosul khua chhanchhuak tura khân pawimawh ber chu Fallujah a nih thu a sawi; Mosul hi Iraq-a IS-te chuan an khawpui bera hman a ni.

Fallujah hi US-in Saddam Hussein-a lalna a paih hnua a zuitu, Sunni Muslim-ten US leh a thurualpuite an beihnaa an hmunpui ber a ni ṭhin a, a hnuah Iraq-a Shi'te sorkar dodalna hmunpuia hman a ni. Kum 2014 January thla khan ISIS te hian he khua hi an la a, kumin May 23 aṭang khan IS te ûm chhuak tur hian Iraq sorkar chuan beihpui a thlak a, tunah hian hmun thuma ṭhen hmun hnih chu an thuhnuaiah an dah tawh.