Bulgaria PM bang tura phutin nawrh huaihawt
Bulgaria khawpui Sofia-a parliament kawtah Nilaini khan an ram prime minister Boyko Borissov chu bang tura phutin mi tam takin nawrh an huaihawt. Thla hnih dawn chu PM hi bang tura phutin nawrh an lo huaihawt fo tawh a ni.
PM Borissov leh chief prosecutor Ivan Geshev-te chu an rama eirukna thleng chungchangah hma la ṭhawk loah nawrh huaihawtte chuan an puh. Hei bakah hian an ramah eirukna hluar mek chuan dan a eichhiat mek thu sawiin, thil dik loh avanga hausa ten thuneihna an nei chho mek niin an sawi.
Parliament kawta pungkhawm ṭhenkhatte chuan artui, apple leh bawlhhlawh te an paih hnawk a, police lirthei an tihchhiat sak bakah puak thei thil an thawh bawk. Police-te nen pawh intawngin, police lam chun mipui pungkhawm hnawtdarh nan hian pepper spray te an hmang a ni. He buaina kaihhnawihah hian Police-te chuan nawrh hauihawt zinga 60 an man.
Nilaini khan nipui chawlh an neih hnua Parliament ṭhutkhawm lehna hmasa ber neih a ni. President Rumen Radev chuan Borissov kaihhruai centre-right sorkar chu bang tura phutin, deputy-te hnenah ram danpui siam thar tuma ruahmanna an siam pawh titawp turin a ti bawk. Mipuiten nawrh an huaihawt chu ram danpui ṭhat tawk loh vang ni loin, ram hruaituah rinna an neih tawh loh vang zawk a ni, tiin President chuan a sawi.