New Zealand inthlanpuiah PM Jacinda Ardern a chak

New Zealand prime minister Jacinda Ardern leh a party, Labour Party chu Inrinni-a an ram inthlanpui  neihah hneh taka thlan tlin leh an ni. 

October 17 khan seat 120 awmna,  House of Representative inthlan­pui neih niin, political party 17-ten an chuh a ni. Rorellai Labour party chuan seat 64 lain, vote tla aṭangin 49% a hmu phak a ni. An khingpui ber, National Party chuan vote 27% a hmu tih Electoral Commission chuan a tarlang. Chak tur hian seat 61 hmuh phak a ngai a, Labour Party hian party malin sorkarna a siam thei dawn ta a ni. 

Covid-19 hri leng dona kawnga PM Ardern leh a kaih­hruai sorkar an chet ṭhat avangin inthlan neih hma aṭangin Labour party hi an chak leh ngei rin lawk a ni. PM Ardern hi nikuma Christ churh-a mosque-a inkhawmte pawng kah an nih hnua an rama silai khapna dan khauh tak a siam zui nghal avang te, hripui leng dona kawnga a hmalakna avang tein an ram mipuite chauh ni loin, ram dangte fak pawh a hlawh hle. New Zealand-ah hian Covid-19  kai hmuh chhuah 1,500 vel awmin, he hri thihpui hi mi 25 chauh an awm a ni. 

Labour party hi kum 1996 hnua proportional voting system hman a nih hnua party mala seat la hnem ber leh, party mala sorkarna siam thei hmasa ber a ni dawn a ni. Inthlan hmasaa an sorkar khan Labour party hian Green Party leh nationalist New Zealand First party an thawhpui a ni.

Hnehna an chan hnuah Auck­land-a an party mi leh sa pungkhawmte  hmaa thu a sawiah, Ardern chuan an ram economy siamṭha turin a bei dawn a, mitin tana thawkin, hna tam zawk siam a, mipuite training ṭha tak pek a, an ram leilung humhalh  leh intluk tlanna a awm theihna atana theihtawp a chhuah tur thu a sawi.

Kum 40 mi Ardern leh a pawl ten hnehna an chan chungchangah hian eptu pawl National Party hruaitu Judith Collins chuan lawmpuina thu a sawi a, ram hrang hrang hruaituten lawmpuina an hlan  bawk. 

Ruahman lawk dan chuan September 19 khan inthlan hi buatsaih tum a ni a, mahse Covid-19 hri leng vangin tihkhawtlai a ni.