Biden-a'n US President inthlan a chuh dawn lo tih a puang; Democrats Presidential candidate tur thlan thar leh a ngai

US president Joe Biden chuan kumin kumtawpa US president inthlan lo awm tur chu a chuh dawn lo tih a puang. Biden hian Democrats presidential candidate aṭanga inhnukdawk tura nawrna a tam vangin he thutlukna hi a siamta niah a ngaih theih.

Joe Biden hian July 18 khan Covid-19 hri a kai tih hmuhchhuah niin he hri vanga khung hran a nih lai hian mahni inenlet nan hun thawl zawk neiin, inthlan chungchanga thutlukna a siam an ring hlawm a, Pathianni zan khan a thutlukna hi X lamah tarlangin inthlan chuh a tum loh tih a sawi chiang ta a ni.

Biden chuan US president a nih laiin hmasawnna tam tak an nei hman tih sawiin, khawvel ram zinga sum leh pai dinhmun ṭha ber an nih thu leh damlo enkawlna kawnga an hnathawh ṭhatte a tarlang. Biden chuan,"Inthlan chuh leh chu duh mah ila, kan party leh ram tana ṭha zawk tur nia ka rin vangin inhnuhdawh mai ṭha ka ti a, president ka nih hun chhung ṭha tak hmang zo turin ka insawrbing tawh zawk dawn a ni" a ti.

Eng vangin nge Biden an duh loh?

US president ṭanglai Joe Biden hi a party, Democratic Pary mi leh sa zinga inthlan chuh loh tura duhna thawm a rawn len chhoh leh, inhnukdawk mai tura an nawrna chhan bulpui chu June 27-a a khingpui tur, Republican presidential candidate Donald Trump nena an inchapchar ṭum a chet chhiat vangah a puh theih. He debate-ah hian Biden hi a che chhe hle a, mipuiten a laka beiseina an neih a hlohtir bakah an beisei tur thil thar a chhawpchhuah sak lo a, debate zawh hnu hian inhnukdawk tura duhna a lian chho ta hle a ni.

Biden-a campaign team-a mi pawimawh tak takte chuan team an chhuahsan a, hei mai bakah amah thlawp ṭhintu mi langsar leh party chhunga thil titheite pawn Biden thlawpna an lantir lo bawk.

Debate-a a chet chhiat mai bakah hian Biden hi hemi hma lama poll neihah pawh a cheṭha lo a, a khingpui Donald Trump chu chungnung zawk deuh zel a ni. Biden hi kum 81 mi niin US President upa ber a ni a, hemi vanga duh lotu pawh an awm a, Democrats party chhungah ṭhalai zawk leh hmel thar hmuh duhna lian tak a awm vangin Biden duh lohna hi a awm a tih theih bawk a ni.

Democrats aiawh turin Harris nge mi dang?

Joe Biden-a'n inthlan a chuh dawn lo tih a puan hma hauhin tunge a thlaktu ni ang tih zawhna a lian hle a, he zawhna hi Biden-a'n thutlukna a siam hnu pawhin chhanna mumal tak a la awm thei chuang lo.

US president inthlan lo awm turah hian Biden chuan a aiawhtu atan kum 2020-a a running mate, kum 59 mi Kamala Harris chu a duh ber tih sawiin vice president tura a thlan chu a thutlukna siam ṭhat ber a nih thu a sawi. Candidate aṭanga a inhnuhdawh thu a puan rual hian, "Vawiin hian kan party aiawh tur atana ka duh leh thlawp chu Kamala hi a ni tih ka sawi duh a ni. Democrats tan ṭanrual leh Trump hneh a hun ta" a ti a ni.

US vice president ni mek Kamala Harris hian Biden thlawpna dawng mah se Democrats party mi leh sa dangte chuan inthlan chuh tur hian an pawm dawn em a hriat loh. President hlui Bill Clinton leh a nupui, secretary of state hlui Hillary Clinton-ten Harris hi party nominee atan an thlawp thu an sawi laiin, president hlui Barack Obama leh House Speaker hlui Nancy Pelosi-te erawh chuan a thlawp thu an sawi lang ve lo. Obama chuan party hruaitute chuan nominee ṭha tak thlan chhuahna tur remchang an la siam dawn a ni, a ti.

Party candidate tihfelna turin hun ngah lo

Democratic National Convention hi August 19-22 hian neih a ni dawn a, party convention-ah an party presidential candidate tur hi officiala an puan a ngaih dawn avangin hun an nei tam tawh lo hle. US President inthlan hi November 5 ah nei a ni dawn a ni.

Democrats aiawh tur hian Kamala Harris hming hi sawi rik ni mah se candiate hi a ni nghal ngawt thei lo a, state hrang hranga Democrats delegate-ten party candidate tur hi an thlang leh dawn a ni. Kamala Harris bakah candidate tur hian Illinois Governor J.B. Pritzker, Michigan state Governor Gretchen Whitmer, California Governor Gavin Newsom, Pennsylvania Governor Josh Shapiro, North Carolina Governor Roy Cooper, Kentucky State Governor Andy Beshear leh senator Mark Kelly te hming pawh sawi rik a ni bawk.

Democratic National Committee chairperson Jaime Harrison chuan Democratic nominee thlanna chu langtlang tak leh, felfai taka kalpui a ni dawn tih sawiin, nominee thar thlan dan chungchangah Nilaini hian meeting an nei dawn tih a sawi.

Party candidate thlanna, primary election a zawh vek tawh avangin convetion-ah hian delegate 3,900 vel chuan party presidential candidate hi an thlang dawn a ni. Delegate 3,900 vel bakah automatic delegate 500 vel an awm bawk a , hengte hi governor, Congress member leh Democratic Party official-te an ni. Delegate vote thlak aṭanga president candidate ni tura majority vote hmu phak an awm loh chuan, automatic delegate-te hian vote an thlak ve leh ang.

Kamala Harris hi nominee a nih theih chuan, Joe Biden-a campaign fund an chhawm thei dawn a ni. Biden campaign fund hi June thla tawp thleng khan USD mtd 95 a tling tawh. Mahse candidate dang zawk thlan tlin a nih erawh chuan fund hi Democratic National Committee emaw, super PAC-ah emaw chhun luh a ni thung ang. President nominee atana thlan chhuah hian a vice president tur a thlang ang a, hei hi delegate lamin an pawmpui ve leh a ngai dawn a ni.