France : Charlie Hebdo chanchinbuin Prophet lem chhuah nawn leh
France rama Charlie Hebdo chanchinbu chuan kum nga liamtaa Islamist firfiakten Paris-a an office bei a, mi 12 an kahhlum phahna, Prophet Mohammed lem a tihchhuah chu Thawhlehni khan an chanchinbuah an tichhuak nawn leh.
Kum 2015 January 7 khan Prophet Mohammad sawisakna lem an tihchhuah chu Islam firfiakten an haw hle a, firfiak zinga mi Said leh Cherif Kouachi-te unau chuan Paris-a Charlie Hebo office beiin mi 12 an kahhlum bakah mi dang 11 in hliam an tuar. Thi zingah hian cartoonist-te pawh an tel a ni. Office beitu pahnihte hi January 9, 2015 khan Paris khaw pawna an inkahnaah police office-ten an kaphlum a ni. Charlie Hebdo office beihna thleng hian khawvel a nghawng a, free speech leh sakhaw insawisel sak chungchangah pawh inhnialna a chhuah phah nasa hle a ni.
Cartoon tihchhuah chungchanga pawikhawihna thlenga inhnamhnawiha puh mi 14 te chungthu chu Nilaini khan ngaituah leh a ni a, an thubuai ngaihtuah a nih hma ni chiah, Thawhlehniah Prophet lem hi chanchinbu hian an tichhuak leh ngat a ni.
Prophet cartoon a tihchhuah nawn leh chung changah hian ngaihdan hrang hrang a awm a, ṭhenkhat chuan Charlie Hebdo hian free speech and expression chungchanga aw chhuahna atan an hmang leh nia an sawi laiin, ṭhenkhat chuan he chanchinbu hian a thil tihsual tawh chu a tisual nawn lehah an ngai thung.