Khawvelah Covid-19 kai tam ber ni thleng Europe-ah Covid-19 a darh nasa leh Kar liam ta Zirtawpni khan khawvel p

uma Covid-19 hri kai thar chu mi 4,00,000 chuang an awm a, hei hi ni khat chhunga khawvela Covid-19 hri kai tam ber ni a ni.

Khawvel puma Covid-19 hri kai tawh zawng zawng hi mi maktaduai 40 an chuang tawh a, heng zinga enkawl dam tawh hi mi 2,99,20,926 awmin, hri thihpui hi mi 11,15,176 an awm tawh bawk. 

US chu khawvela hri kai tam berna a la ni a, hri kai tawh zat hi mi 83,43,140 an ni a, India chuan dawtin India-a hri kai tawh hi mi 74,94,551 awm tawhin, Brazil-ah hri kai hi mi 52,24,362 an tling tawh. 

Latin America chu hri leng hluarna ram a ni mek bawk a, khawvel puma Covid-19 case 27% chu Latin America ramte aṭangin a ni. Asia, North America leh Europe-ah hri a la darh mek bawk a ni. 

Europe-ah chuan Covid-19 hri leng thawh hnihna a thleng chhunzawm tawh a, ram economy dinhmun ngaihtuahin lockdown em chu puan ni lo mah se, hri leng hluarna khua leh hmunahte chuan inkhuahkhirhna khauh tak hman a ni. Tun hnaiah Europe-ah hian hri kai thar hi nitin mi 1,40,000 an awm anga chhut a ni. 

Hei vang hian khawvela hri kai thar hi an pung chak leh phah nia sawi a ni a, Europe chu Covid-19 hri tamna hmun (coronavirus epicentre)-ah a chang leh mek niin mithiamte chuan an sawi. 

Khawvela Covid-19 hri kai tam ber ram pathum United States, India leh Brazil-a nitina hri kai thar aiin Europe-a hri kai thar hi an tam zawk a, khawvel puma hri kai thar mi 100 zela mi 34 chu Europe aṭangin an ni tih Reuters analysis chuan a tarlang.

Nimin, October 18 thleng khan Europe-a hri kai thar zinga a zahve chu United Kingdom, France, Russia, Netherlands leh Spain aṭangin an ni. Europe ram zingah hian France chu hri kai hluarna ram a ni a, nitin hri kai thar mi 19,425 an awm ziah anga chhut a ni.