India mi pahnih firfiaka puang tura Pakistan nawrna hnawlsak

United Nations Security Council (UNSC)-a ram panga, US, UK, France, Germany leh Belgium chuan Nilaini khan Pakistan-in India mi pahnih, UN hnuaia firfiaka puang tura a nawrna chu an hnawlsak. 

Pakistan hian United Nations-in firfiaka a puan tur atan India mi pahnih, Gobinda Patnaik leh Angara Appaji te hming a thehlut a, mahse Nilainia UNSC 1267 committee-ah ngaihtuah a ni a, UNSC ram pangate chuan heng mi pahnihte firfiaka puan an nih theihna tur atana fiahna (evidence) a awm loh avangin Pakistan-in rawtna a thehluh hi an pawmsak ta lo a ni.

Nilainia committee-ah hian UNSC member-te chuan Pakistan hnenah hian India mi pahnihte firfiaka puan an nih theih nan fiahna (evidence) rintlak tak chu committee-a pe turin an ngen a, mahse hun pek hnuah pawh Pakistan lam hian fiahna rinthlak tak a pe thei lo a ni. Hemi chungchangah hian India ram aṭanga UN palai TS Tirumurti chuan Pakistan-in India mawi lo taka puhchhiat a tum thu sawiin, committee-a Pakistan thehluh pawm lotu council member zawng zawngte chungah lawmthu a sawi. 

A hma pawhin Pakistan hian India mi pahnih, Venumadhav Dongara leh Ajoy Mistry-te chu UN firfiak list siama telh turin a lo phut tawh a, mahse a hlawhchham a ni. Hemi chungchangah hian June thla khan Pakistan foreign ministry chuan Venumadhav Dongara chu UN firfiak list siama telh a nih loh avangin a lungawi lohna thu a tarlang.

Nikum February thlaa Kashmir-a Pulwama district-a Central Reserve Police Force (CRPF) convoy beih a nih chungchanga mawhphurtu nia puh Pakis­tan thlawp Jaish-e-Mohammad (JeM) firfiak pawl hotu Masood Azhar chu UN chuan nikum khan firfiakah a puang a ni. 

Hei vang hian Pakistan chuan India mite hi firfiaka puang ve turin UN-ah hian ngenna an thehlut ta a ni.