Democrats delegate tam zawkin Kamala Harris an thlawp

US President thlanna neih turah Democratic party candidate tur thlan ṭhat leh a ngai dawn a, hetih lai hian vice president ni lai, Kamala Harris chuan party nominee ni tur hian Democratic delegates tam zawk thlawpna a nei tawh nia tarlan a ni.

President Joe Biden-a'n Pathianni zana US President inthlan a chuh tawh dawn lo tih a puan hnuah, Kamala Harris hian party candidate nih tumin hma a la ve nghal a ni. Associated Press chuan survey a neih aṭangin Thawhṭanni zan khan nomination paltlang tura delegate thlawptu neih ngai zat, 1,976 thlawpna a hmu tawh niin a tarlang. November 5-a US President thlanna neih tura Republican party candidate, Donald Trump nen an inhmachhawn thei dawn ta a ni.

Kamala Harris hian delegates thlawpna a mamawh zat hmu tling tawh nia sawi ni mah se, August thlaa Chicago-a Democratic National Convention neih hunah official-in party candidate atan puan a ni chauh ang. Party presidential candidate tur thlangtu, delegate-te hian August 1-7 hian vote an thlak dawn a ni.

Biden-a'n Democrats presidential candidate a nihna aṭanga a inhnuhdawh thu a puan hnuah chawpchilh takin amah thlaktu tur hi thlan a ngai a, a thlaktu tura rinkai ber Kamala Harris pawhin a running mate, vice president candidate tur pawh a la thlang lo a ni. Mi tam tak chuan rualkhai zawka kalpui a nih theihna turin a running mate atan hian mipa a thlang dawn niin an sawi a, a thawhpui tura rin hming sawilan langsar deuhte chu - Kentucky Governor Andy Beshear, North Carolina Governor Roy Cooper, Senator Mark Kelly, Illinois Governor JB Pritzker leh Pennsylvania Governor Josh Shapiro te an ni. A vice president candidate tura a thlan hi delegate in an pawmpui ve leh a ngai bawk ang.