Hamas leh Fatah-ten inremna an ziak

Palestinian pawl pahnih, Hamas leh Fatah chuan an inrem lohna dah ṭhaa ṭangrual turin inremna an ziak tih Chinese state media chuan nimin khan a tarlang. Hamas leh Fatah hian Palestinian pawl dang 12-te nen Beijing-ah inremna hi an ziak a ni.

Hamas leh Fatah inremna ziah hi Beijing Declaration tia vuah niin, an inkara inhriatthiam lohna awm titawp tur leh Palestinian inpumkhatna thlen turin inremna hi an ziak a ni. Hamas leh Fatah bakah Palestinian political faction dang 12 chuan Chinese foreign minister Wang Yi hmuin, Pathianni aṭang khan inbiakna an nei ṭan a, nimin khan inremna neih a nih tih puan a ni ta a ni.

China foreign minister Wang Yi chuan Palestinian pawl hrang hrang 14 hian Gaza indona a tawp huna Gaza awp turin inremna an nei thei tih a sawi. Wang Yi chuan,"Palestinian pawl hrang hrang tan inremna neih hi an duhthlanna a ni, mahse inremna nei tur hian khawlvel ram dangte puihna an mamawh a ni" a ti. Middle East-a remna leh muanna a awm theih nan China chuan hma lak a duh tih a tarlang bawk.

Hamas sipaiten Gaza Strip aṭanga Fatah an pet chhuah hnuah an inkar hi a ṭha lo a, hemi hnu rei lote, kum 2006-ah inthlan neih niin Hamas chuan hnehna an chang a, an inkar chuan ṭhat lam a pan thei ta lo. Kum 2007 aṭang khan Gaza chu Hamas awpna hnuaiah awmin Palestinian pawl zinga sakhaw zalenna duhtu, Fatah erawhin Israel awpna hnuaia awm West Bank-ah thuneihna pum hlum nei lo mah se rorelna fawng an chelh ve thung.