Ethiopia-ah leimin vangin mi 55 an thi

Ethiopia chhim lam, Kencho Shacha Gozdi district-ah Thawhṭanni zinga leimin vangin mi 55 an thi tih tarlan a ni. Leiminin a chilh ruang zawn hna hi kalpui mek a ni a, thi zat hi a la pung a rinawm nia tarlan a ni.

Gofa Zone Communications Affairs Department chuan leiminna hmun aṭang hian ruang 55 aia tam lak chhuah a ni tawh niin an tarlang. Dagmawi Zerihun chuan thi zingah hian hmeichhia leh naupangte pawh an tel tih sawiin thi zat hi an la pun belh thei niin a sawi bawk. Zerihun chuan leiminin a chhilhte zawn hna hi ngawrh taka kalpui mek a ni, a ti. Dam chhuak zawn hna hi hmanrua an neih ṭhat loh vangin a hautak hle a, leiminin a chhilh la damte la chhuak turin an kut hmangin lei an hai lai thlalakte chu hmuh theihin a awm.

Ethiopia chhim lam hian kum 2018 khan leimin na tak a lo tuar tawh a, kar khat chhunga leimin ṭum hnih thlengah mi 32 an thi a ni. Tun ṭuma leimin thlenna hmun, Gofa zone hi Ethiopia khawpui Addis Ababa aṭanga kilometer 450 vela hlaa awm niin, United Nations agency OCHA in a tarlan danin April leh May thlaah ruahsur nasa vangin buaina an tawk nasa ṭhin hle. Kumin May thla khan Ethiopia chhim lama zone hrang hrangah tuilian vangin mi 19,000 chuang in buaina an tawk tih tarlan a ni bawk.