UNAids in HIV hri chungchanga khawvel dinhmun a tarlang

International Aids conference chu Munich, Germany-ah a ṭum 25-na neih niin Thawhṭanni khan UNAids chuan HIV hri chungchanga khawvel dinhmun a tarlang.

UNAids chuan report a tihchhuahah hian khawvel pumah kum 2023 khan mi mtd 39.9 HIV natna kai an awm tih a tarlang. HIV hri kai thar hi nikum chhung khan mi mtd 1.3 an awm tih tarlangin, Aids vanga thi mi nuai 6.3 awmin heng zinga 76,000 chu naupang an ni tih a tarlang bawk.

Khawvel ram hrang hrang zingah Africa ramte chuan HIV do hna an thawk ṭha hle a, Sub-Sahara huamchhungah kum 2010 aṭanga chhutin HIV natna kai hi 56% laiin an tlahniam a ni. Hemi hun chhung vek hian khawvel puma HIV hri kai zat pawh 39% in a tlahniam bawk.

UNAids report-in a tarlan danin, khawvel hmun dang- eastern Europe, central Asia, Latin America, Middle East leh North Africa-ah he natna kai zat hi an pung ve thung tih a tarlang. Khawvel pumah he natna hlawhtling taka do let a nih theih nan kumin chhunga hmalakna chuan awmzia thui tak a nei dawn niin UNAids report chuan a tarlang bawk. Ram hrang hrang hruaituten kum 10 dawn liam taa UN sustainable development goals zinga mipui hriselna tiderthawngtu, Aids natna kum 2030 hmaa mipui tana hlauhawm loha siam an tumna erawh a hlawhtling hman a rinawm ta lo a ni.

UN Aids executive director Winnie Byanyima chuan mipui zalenna rahbeh a nihna ramah HIV hri kaite enkawlna mumal pek an har tih a sawi. Kum 2030 hmaa Aids natna um bo chu thil theih ni mah se ram hruaituten kutah a hlawhtlinna a innghat tih Byanyima chuan a sawi. International AIDS Society president, Dr Sharon Lewin chuan khawvel ram zingah tih takzeta Aids natna dotute ramah HIV kai zat an tlahniam tih sawiin, ram hausa ni kher loah pawh he hmasawnna hi a hmuh theih a ni, a ti.