IS-te'n Japan mi an hren an tihlum leh

Islamic State (IS)-te chuan kar kalta Inrinni khan Japan mi an hren, freelance journalist Kenji Goto an tihhlumna video an tichhuak leh.

Video-ah hian Japan mi an hmuhte tihhlum chhunzawm zel an tum thu leh, Japan tana hun hrehawm a inṭan tawh thu an tarlang nghal bawk.

IS-te hian a hmain Japan mi an man, Haruna Yukawa chu an lo tihlum tawh a, hemi hnu hian Goto thlengna atan hian Jordan rama tang mek, an pawl member pakhat chu chhuah an phut leh a ni. Tang inthleng tur chungchangah hian Japan, Jordan leh IS te'n thutlukna an siam theih tak loh vangin Goto hi an that leh ta a ni.

Kum 47 mi, Kenji Goto hi nikum October thla khan Yukawa chhuah theih dan tur ngaihtuah hian Syria ramah a kal a, mahse firfiakte hian amah hi an lo man ve leh a ni.

Japan Prime Minister Shinzo Abe chuan IS-te thiltih chu 'nunrawng thlak leh tenawm' a ni tiin, firfiakte chu eng tikah mah a ngaihdam loh tur thu a sawi. "Japan chuan khawvel ram dangte thawhpuiin, he pawikhawihna rapthlak tak thlenga mawhphurtute hrem an nih ngei theihna turin a thawk dawn a ni. Firfiaka chetna lakah Japan hi a tlawm dawn lo," a ti. Goto-a chhungte a tawrh­pui tak zet tih a sawi bawk.

UN Secretary General Ban Ki-moon pawhin IS chetdan rawng tak chu a dem thu a sawi a, an mi hren dangte chu chhuah vek turin a ngen. US President pawhin IS tichhe turin beihpui an thlak chhunzawm zel tur thu a sawi a, France President Francois Hollande chuan France leh Japan chuan Middle East-a remna leh muanna a awm theihna atan thawkin, firfiak pawlte nuaibo tura an thawh chhunzawm zel tur thu a sawi.