Bangladesh eptu office-a power supply tihtawpsak

Bangladesh sorkar chuan Inrinni khan eptu pawl Bangladesh Nationalist Party (BNP) hruaitu, Khaleda Zia-i chenna in, office atana a hman nghala eng a pek chu a tihtawpsak a, mahse darkar 20 hnuah pek chhunzawm leh a ni.

Electric Supply authority chuan Dhaka-a Zia-i office-a power a pek a tihtawp chhan chu Zia-i hian a office aṭang hian an party mi leh sate chu sorkar laka lungawi lohna lantir leh inthlan ṭhat phuta nawrh an huaihawt­naa pawikhawihna thlen turtein a fuih niin an sawi. BNP member-te'n an nawrh huaihawtnaa petrol bomb-te an tihpuah avang hian mi 41 in an thihphah tawh a ni.

BNP joint secretary general Rizvi Ahmed chu thuneitute'n an man tawh bawk a ni. Zia-i hi January 5 aṭang khan sorkar laka lungawi lohna lantir­a nawrh huaihawt a tum avangin pawn chhuak thei loin a inah hren a lo ni tawh bawk.

Power supply tih­tawp­sak a nih hma hian Shipping Minister Shajahan Khan chuan Khaleda Zia-i'n amah zuitute nawrh huai­hawt a, kawngpuite a dantir chu titawp tur­in a hrilh a, a tihtawp loh chuan a office-a tui leh electric peknate chu tihtawpsak vekah a lo vau tawh a ni.