Chile President-in nau tihtlak khap burna dan tihtawp a rawt
Chile President Michelle Bachelet chuan an rama nau tihtlak khapna dan chu tihtawp a tum thu a sawi.
Bachelet-i hian pawngsual tawh vanga naupai leh, nu naupai lai emaw naute emaw nunna atana thil hlauhthawnawm a nih chuan nau an tihtlak phalsakna tur dan hi Congress-ah a pharh tawh a ni.
Roman Catholic ram, Chile-ah hian nau tihtlak hi khap tlat a ni a, he dan bawhchhia-te chu kum nga thleng lung in tantir theih an ni.
Bachelet-i chuan, "Nau tihtlak khap bur a nih vang hian kumtinin Chile hmeichhia tam tak nunna chu derthawng takin a awm phah a, hei bakah hian nau titlak khap a, hremna na tak siam a nih vang hian nau tihtlak hi a rem phah chuang lo a ni," a ti.
President rawtna hi Catholic Church bakah, a kaihhruai ṭangrual pawl aṭang ngei pawhin dodaltu tam tak an awm.
Gen Augusto Pinochet-a kaihhruai sipai rorelna hnuaia an awm lai, kum 1989 khan Chile-ah hian khan nau tihtlak khapna dan hi siam a ni a, he khap burna dan siam danglam rawtna hi kum 1991 aṭang khan Chamber of Deputies leh Senate-ah ṭum 11 zet pharh a ni tawh a, mahse a la hlawhtling thei lo.
Chile ram mipuite tam zawk chuan nau tihtlak chungchanga President rawtna hi an thlawp a, mahse a hma pawhin rawtnate hi Congress-ah hnawl a lo ni zel a ni.
Latin America ram tam zawkah hian nau tihtlak chungchangah hian phal chin siam a ni a, hetihlai hian ram pasarih- El Salvador, Dominican Republic, Nicaragua, Honduras, Haiti, Suriname leh Chile ramahte chuan khap bur a ni thung.