Egypt-in Australian journalist a chhuah zalen

Egypt sorkar chuan Australian journalist, al-Jazeera reporter Peter Greste chu Cairo tan-inah ni 400 zet a tantir hnuin Pa­thianni khan a chhuah.

Australia Foreign Minister Julie Bishop chuan Greste hi Cyprus panpui a ni a, heta ṭang hian Australia ramah hruai haw a ni ang, a ti. Greste hi thu delhkilh engmah awm loa chhuah a nih thu a sawi bawk.

Greste ruala man, al-Jazeera journalist dang pahnih- Baher Mohamed leh Mohamed Fahmy-te erawh chu chhuah an la ni lo. An pathum hian Egypt sorkarin tun hnaia firfiak pawla a puan, President hlui Mohamed Morsi-a party, Muslim Brotherhood ṭanpuiah puh an nih bakah, thu dik lo thehdarha puh an ni. Nikum June thla khan thiam loh chantir an ni a, kum 7-10 tang tura hrem an ni.

Al-Jazeera network chuan an reporter pakhat chhuah a ni ta chu lawmawm a tih thu a sawi a, hemi rual hian midang pahnihte pawh chhuah nghal tura phutin, chhuah an nih hma chuan an zalenna turin an bei chhunzawm zel dawn tih a sawi.

Peter Greste-a unaupa, Andrew Greste pawhin a nau hian a thawhpui pahnihte hi a theihnghilh dawn lo a, chhuah an nih theihna atan a bei zui zel dawn a ni, a ti. Cyprus aṭanga Australia an pan hun tur hi an la sawi­chiang lo.

Egypt President Abdel Fattah al-Sisi chuan tun hnaiah dan thar siamin, an rama ramdang mi tangte chu thawn haw phalsak an ni. He dan thar hmang hian Cairo court chuan Greste hi a chhuah a ni.