Bangkok-a shopping centre-ah bomb a puak

Thailand khawpui, Bangkok-a Siam Paragon luxury shopping centre-ah Pathianni khan ṭum hnih bomb a puak a, mi pakhatin hliam a tuar.

Police-te chuan bomb hi steel pipe-bomb, puak na lo chi niin an sawi a, electric control-na hnung lamah hmuh a nih thu leh timer hmangin mipui lun lai taka tihpuah tura kam a ni tih an sawi. Shopping mall pawn lama tihpuah a ni. Bangkok-a bomb puak hi nikum May thlaa sipai sorkar a din hnua a thlen vawi khatna a ni.

Prime Minister Prayuth Chan-ocha chuan khawpui chhungah venhimna khauh zawka kalpui turin thupek a chhuah nghal a, "He thil thleng hian sipai rorelna kan la mamawh zia a tilang a ni. Mi sual tak tak, boruak muanawm tichhe zawnga che duh an awm reng a, heng mite hi manin hremna na tak pek an ni ngei ang," a ti.

Royal Thai Police thupuangtu, Lt Gen Prawut Thawornsiri chuan bomb hi nunna lak tuma kam a ni lo a, mahse mipuite tihchiai tumna atana ruahman nia a lan thu a sawi.

Defence Minister Prawit Wong­-suwan chuan hetianga pawi­khawihna thleng hian miin an ram an rinna a tihchhiat phah ṭhin a ni, a ti. Thailand hian tourism hi sum lakluhna peng pawimawh tak atan a hmang a, sorkarin sum lakluh zinga 10% chu tourism sector aṭanga a lakluh a ni.